【愛情只有現實冇童話，拍拖10年都唔一定走到最後】
「分手兩字情絕不留
為愛傷心的聲線變了懷舊
愛不轟動了 什麼都嫌少
最終這片段 完了」
鄧麗欣、方力申，洪卓立、湯怡，呢兩對情侶拍拖超過10年，人前放閃，人後繼續甜蜜，曾經係眾人眼中既金童玉女。我地總係將對愛情既憧憬、幻想投射喺佢地身上，覺得佢地可以一直相愛到老，可惜現實唔係童話，或者連佢地本人都冇諗過曾經講過幾愛、幾愛，都有走到最後既一日。
有人難以接受，甚至質疑：「當拍拖超過10年都會分手，究竟呢個世界係咪仲有天長地久既真愛？」係，冇錯佢地係明星，但唔代表佢地既感情比起普通人特別，佢地遇到問題一樣會鬧交，覺得心淡一樣會提出分手。如果咁樣就唔相信愛情，每日咁多人過身，唔通你又唔相信生命？
捱得過3年，越過左5年，跨得過7年...一個女仔願意為愛人付出青春，唔可能突然話唔愛就唔愛；一個男仔為將來拼搏，唔可能突然話放棄就放棄。10年感情走過黎的確唔容易，咁多年要雙方花心機、花精神去經營同保鮮，去到某個位，當你同佢都覺得行唔到落去，決定分手，其實好多時係因為生活上既野磨滅左呢份愛。
拍得愈耐愈易分手，未必只有厭倦對方呢個理由......因為了解而一齊，因為過份了解而分開，可能大家成長左，發現自己想要既野同當初唔同，未必同錢有關，更多係精神上既需要。結果相處得愈耐，步伐愈唔一致，彼此既距離慢慢變遠。相愛時間長唔代表愛得啱，喺合適時間同合適既人一齊好重要，所以最後不如放過大家，各有各找尋真正啱自己既嗰個人。
雖然童話完結，旁人認為好可惜，不過諗深一層，就算彼此由原本以為一生一世既伴侶變成最熟悉既陌生人，都唔代表咁多年一齊既時間係白費，因為冇佢，就唔會有今日既你。
引用返近排《跳躍生命線》既部份獨白，一開始命運將兩個軌迹截然不同既人連成一線，結為伙伴，緣淺既尚且如此；緣深既，命運甚至要佢登堂入室，莫名其妙就成為家中既一份子。
若無相欠，怎會相見；離合聚散，各有定時。分開未必係失敗，就算失敗亦唔使分邊個做錯，你以為失去所有既同時，每個人既出現都有佢既意義，佢既出現係為左考驗你、為左扶助你，更多時係為左帶出最好既你。每個相遇都足以影響一生，喺相遇同相分之間，我地齊齊上了一課──學識被愛，懂得去愛。
Search